Davlatimiz rahbari topshirig‘iga muvofiq aholi muammolari bilan ishlash sohasida yangi tizim joriy etilmoqda. Tajriba sifatida Xorazm viloyatining Xonqa tumani tanlab olindi.
Unga ko‘ra, har bir tashkilot mutasaddilaridan iborat ishchi guruhi sektorlar kesimida tumandagi 44 ta mahallada faoliyat olib boradi.
Ishchi guruhi uyma-uy yurib, har bir xonadonning sharoiti bilan tanishib, aholi muammolari va ijtimoiy-iqtisodiy masalalarini o‘rganib, ularni tezkor va samarali hal qilish choralarini ko‘rishi, jarayonda asosiy eʼtibor og‘ir ijtimoiy ahvoldagi, yakka-yolg‘iz, boquvchisini yo‘qotgan insonlarni qiynayotgan masalalarga yechim topishga qaratiladi.
Mahalla vakillari hamda tashkilot rahbarlari ishtirokida o‘tkazilgan seminar davomida har bir holatga masʼuliyat bilan yondashgan holda belgilangan talablar asosida ish yuritish bo‘yicha ko‘rsatmalar berildi.
