------------------------------------------------------------------------------------

    2020 йил   18 апрель                                       №  4-21                                     Хонқа шаҳарчаси

Хонқа  туманида давлат идора ва ташкилотларида коррупцияга қарши курашиш борасида олиб борилаётган ишлар ҳақида

Бугун демократик қадриятлар қарор топиб бораётган бир вақтда давлат хизматчилари томонидан порахўрлик, мансабини суиистеъмол қилиш билан боғлиқ жиноятлар содир этилиши ҳокимиятнинг обрўсизланиши, давлатнинг сиёсий, иқтисодий, ҳуқуқий тизимига путур етиши, натижада амалдаги ҳокимиятга нисбатан аҳолининг норозилигига сабаб бўлмоқда. Бу ўз ўрнида коррупциянинг мамлакатда ривожланиши ҳамда ўша давлатни таназзулига олиб келади. Ҳар бир жамиятда мавжуд бўлган бу каби иллатларга қарши аёвсиз курашиш борасида мамлакатимизда ҳам қатор ишлар амалга оширилмоқда.

            Жумладан, Ўзбекистон Республикасининг “Коррупцияга қарши курашиш тўғрисида”ги Қонуни, Ўзбекистон Республикаси Президентининг “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги 2019 йил 27 майдаги ПФ-5729-сонли Фармони коррупцияга қарши курашиш борасида муҳим қадам бўлди. Бугунги кунда ушбу йўналишда қабул қилинган норматив-ҳуқуқий ҳужжатлар ижросини таъминлаш бўйича давлат идораларида қатор ишлар амалга оширилмоқда.

Ўзбекистонда коррупцияга қарши курашиш бўйича алоҳида мустақил тузилманинг ташкил этилиши коррупцияга қарши кураш бўйича ташланган энг катта қадамлардан бири десак бўлади. Аввал ҳам коррупцияга қарши курашилган, турли тузилмалар бўлган, бу ишлар асосан ҳуқуқни мухофаза қилиш органлари ҳузурида ташкил этилган, асосан жиноятчиликка қарши курашиш ва унинг олдини олиш билан шуғулланишган, ёки республика комиссиялари бўлган ва улар жамоатчилик асосида ишлашган. Алоҳида агентлик ташкил этилиши Ўзбекистонда коррупцияга қарши кураш бўйича олиб борилаётган очиқлик сиёсатнинг мантиқий давоми десак бўлади.

Дастлаб давлат идоралари фаолиятининг очиқлиги, уларнинг парламент олдида ҳисоб бериш амалиётининг йўлга қўйилгани биринчи қадам бўлди. Корррупцияга қарши кураш агентлигининг тузилгани давлатнинг энг катта сиёсий иродаси. Бу бир томондан, мамлакат бу иллат ўзида чуқур илдиз отганини тан олгани бўлса, иккинчи томондан давлат раҳбари даражасида коррупцияга қарши курашиш кераклиги ва бунинг учун тузилманинг ташкил этилгани бўлди.

            Сенат раиси раҳбарлигида 44 та аъзодан коррупцияга қарши кураш миллий кенгаши ташкил этилди. Уларнинг орасида ҳуқуқни муҳофаза қилиш органлари раҳбарлари, жамоатчилик органлари вакиллари ҳам киритилганини эътироф этиш лозим.

            Президент Фармонида агентликка катта ваколатлар берилган. Давлат ҳокимияти идоралари раҳбарлари томонидан чиқарилган қарорларга нисбатан коррупцион нуқтаи назардан шубҳа бўладиган бўлса, агентлик уларни тўхтатиб туриш ёки бекор қилиш хусусида тақдимнома киритиш ваколатига эга.

            Коррупция – бу жамиятни турли йўллар билан исканжага оладиган даҳшатли иллатдир. Мазкур иллат демократия ва ҳуқуқ устуворлиги асосларига путур етказади, инсон ҳуқуқлари бузилишига олиб келади, бозорлар фаолиятига тўсқинлик қилади, ҳаёт сифатини ёмонлаштиради ва бошқа ҳодисалар илдиз отиб, гуллаши учун шароит яратиб беради. Шу сабабли барча мазкур иллатга қарши биргаликда қонуний кураш олиб боришимиз лозим. 

Халқ депутатлари Хонқа туман Кенгашининг Қонунийлик таъминлаш ва коррупцияга қарши курашиш масалалари бўйича доимий комиссияси раисининг О.Ибрагимовнинг маърузасини тинглаб, Ўзбекистон Республикаси “Маҳаллий давлат ҳокимияти тўғрисида”ги Қонуни 24-моддасига асосан Халқ депутатлари Хонқа туман Кенгаши

                                             Қ А Р О Р        Қ И Л А Д И:

1. Халқ депутатлари Хонқа туман Кенгашининг Қонунийлик таъминлаш ва коррупцияга қарши курашиш масалалари бўйича доимий комиссияси раисининг О.Ибрагимовнинг Хонқа туманида давлат идора ва ташкилотларида коррупцияга қарши курашиш борасида олиб борилаётган ишлар ҳақидаги маърузаси раҳбарлик ва маълумот учун қабул қилинсин.
2. Туман прокурори, туман ички ишлар бўлими бошлиғи, давлат солиқ инспекцияси, жиноят ишлари, маъмурий, фуқаролик ва иқтисодий судлар туманда коррупцияга қарши курашиш бўйича олиб бораётган ишлари бўйича халқ депутатлари туман Кенгаши сессияларида ахборотлар бериб бориш вазифалари топширилсин.
3. Хонқа туман ҳокимининг биринчи ўринбосари (Ф.Эрназаров) ҳокимлик ходимлари ўртасида коррупцияга йўл қўймаслик борасида тушунтириш ишлари олиб бориш вазифаси топширилсин.
4. Тумандаги давлат корхоналари ва ташкилотлари раҳбарлари ўзларининг ходимлари ўртасида коррупцияга йўл қўймаслик борасида тушунтириш-тарғибот ишлари ўтказиш вазифаси топширилсин.
5. Ушбу қарорнинг бажарилишини назорат қилиш туман ҳокимининг ўринбосарлари, ҳамда Халқ депутатлари Хонқа туман Кенгашининг Қонунийлик таъминлаш ва коррупцияга қарши курашиш масалалари бўйича доимий комиссияси (О.Ибрагимов) зиммаларига юклатилсин.

            Халқ депутатлари Хонқа туман

          Кенгаши раиси, туман ҳокими:                                                                    О.Жуманазаров